Þrjóskari en andskotinn?

Axel Þór Kolbeinsson skrifar á bloggsíðu sína að hann sé þrjóskari en andskotinn, en hann hefur verið á Austurvelli og inni á alþingi undanfarna daga að ræða við þingmenn.

Smellið hér til að lesa færslu hans.

 

Atburðir dagsins og gjörningur annað kvöld

Nokkrir meðlima Samtaka Fullveldissinna hittust á Súfistanum í Lækjargötu í dag ásamt formanni Aðgerðarhóps öryrkja og fóru yfir stöðu mála.
Í framhaldi af því var ferðinni heitið að alþingishúsinu til að reyna að ná tali af alþingismönnum.  Við náðum ekki nema fimm þegar ég þurfti frá að hverfa en aðrir tóku við kyndlinum og vonuðust til að ná í það minnsta tveim í viðbót.  Við sátum reyndar á þingpöllum þegar Jóhanna sagði:

Mér heyrist hv. þingmaður bera mikla umhyggju fyrir áframhaldandi starfi þessarar ríkisstjórnar þannig að við skulum vona að atkvæðagreiðslan verði með þeim hætti að þessi ríkisstjórn starfi áfram.

Baráttan heldur áfram næstu daga og munum við hittast hvern dag á Súfistanum klukkan 13:30 og höldum þaðan að alþingi.  Vonandi sjá sem flestir sér fært að mæta.

Ég hvet alla sem geta að hafa samband við sem flesta þingmenn á hvaða hátt sem þeir geta, jafnvel með SMS-skeyti.  Munið að best er að ræða við þá af kurteisi því þannig komast okkar skilaboð helst til skila.  Látið þá vita að þið viljið ekki að neinn sitji hjá við atkvæðagreiðsluna um þetta stærsta mál frá lýðveldisstofnun.

Hér er hægt að nálgast tölvupóstföng og símanúmer þingmanna:  http://www.althingi.is/dba-bin/thmn.pl?lthing=.&tegund=%DE&nuvam=1

-----------------------------------------------------------------------

Mætum öll á Þingvöll til að heita á land okkar og þjóð.

Þriðjudaginn 14. Júlí klukkan 20.00 mun hópur fólks mæta á Þingvöll í litlu sætin fyrir framan miðja Almannagjá á svæðinu fyrir ofan Þingvallakirkju.  Þar munu þeir sem vilja fara með heit sín til lands og þjóðar.

Tilgangurinn með þessu er að vekja samhug okkar allra með fullvalda og frjálsri þjóð.

Þessi gjörningur verður ekki á vegum neinna samtaka eða annarra hópa, heldur er um einstaklinga að ræða sem koma allsstaðar að.

Guðni Karl Harðarson er hugmyndasmiðurinn á bak við þennan gjörning.

Ég hvet sem flesta til að mæta.

Axel Þór Kolbeinsson

Fundur í gær.

Samtök Fullveldissinna héldu opinn spjallfund í gærkvöldi og mættu til okkar tveir alþingismenn, þeir Ásmundur Einar Daðason, VG og Pétur Böndal, Sjálfstæðisflokki.  Fundurinn sjálfur var vel mættur miðað við með hve skömmum fyrirvara boðað var til hans.

Rætt var um mögulega aðildarumsókn Ríkisstjórnar að ESB og Icesave samningana.  Voru fundarmenn sammála um það að fólk ætti að taka sig til og hafa samband við sem flesta alþingismenn, helst í eigin persónu en í síma eða tölvupósti annars, og gera þeim grein fyrir sinni afstöðu sem kjósenda.  Jafnframt var minnst á að auka fjölda fólks á Austurvelli í friðsömum mótmælum og fjölmenna á þingpalla.

Ég mun sjálfur vera við og í þinghúsinu næstu þrjá daga frá klukkan 14:00 - 17:00 ef einhverjir vilja slást í hópinn.

Hér er listi yfir alþingismenn og netföng og símanúmer þeirra.

f.h Samtaka Fullveldissinna

Axel Þór Kolbeinsson

Opinn spjallfundur

Sunnudagskvöldið 12. júlí kl. 20:00 munu Samtök Fullveldissinna halda opinn spjallfund í kjallaranum á Kaffi Rót í Hafnarstræti 17, Reykjavík.
Umræðuefnið mun vera ESB og tengd málefni.  Búist er við góðum gestum.

Við hvetjum sem flesta til að mæta.

 

Yfirlýsing stjórnar Samtaka Fullveldissinna um Icesave-samninga

Samtök Fullveldissinna lýsa yfir andstöðu við fyrirliggjandi Icesave-samninga og lýsa undrun sinni á tilraunum ríkisstjórnarinnar til að hræða almenning og Alþingi með áróðri um einangrun þjóðarinnar frá alþjóðasamfélaginu verði samningarnir ekki samþykktir.

Samtök Fullveldissinna minna á skyldur ríkisstjórnar og Alþingis við æsku landsins og hvetur þingmenn til að minnast loforða sinna um að standa með þjóðinni í endurreisn landsins. Það er ekki gert með auknum skuldbindingum sem geta vegið að afkomu allra þegna hennar til frambúðar.

Alþingi ber skylda til að standa á rétti Íslands í Icesave-málinu og láta fara fram ítarlega úttekt á þeim þjóðréttarlegu atriðum sem það varðar. Í núverandi gerð stenst samningurinn ekki lög og milliríkjasamninga. Ákvæði EES samningsins og lög um Tryggingarsjóð Innstæðueigenda undanskilja ábyrgð ríkisins, sbr álit Ríkisendurskoðunar.

 

 

Skrár tengdar þessari bloggfærslu:

• Yfirlýsing ásamt greinagerð og lagatilvitnunum.

Enn mótmælt á Austurvelli.

Mótmæli gegn IceSave samningunum halda áfram í dag.  Boðað hefur verið til mótmælastöðu á Austurvelli frá 14:00 og fram eftir degi.

Samtök Fullveldissinna hvetja þá sem ætla að taka þátt í mótmælum að hafa þau eins friðsöm og hægt er.

Mótmælastaða á Austurvelli

Boðað hefur verið til mótmælastöðu á Austurvelli kl.15:00 í dag á meðan þingheimur ræðir um Icesave samningana.
Bráðabrigðastjórn samtakanna hvetur fólk til að nýta sér sinn rétt á friðsömum mótmælum ef það svo kýs.

f.h. Bráðabrigðastjórnar

Axel Þór Kolbeinsson

Við þjóðaratkvæðagreiðslu skyldi horfa til sögunnar.

Axel Þór Kolbeinsson skrifar á bloggsíðu sína:

 

Þegar til þjóðaratkvæðagreiðslu kemur um stór mál sem hafa í för með sér varanlega breytingu á stjórnskipulagi þjóðar er eðlilegt að líta til þeirrar síðustu.

Síðasta þjóðaratkvæðagreiðsla um málefni sem breytti stjórnskipulagi á Íslandi var þjóðaratkvæðagreiðslan um afnám sambandslaganna frá 1918.  Í 18.gr. þeirra laga er farið yfir þau skilyrði sem þurfti svo sátt gæti verið um svo stórt og víðtækt mál...

 

Smellið hér til að lesa meira.

 

 

Aðildarviðræður við ESB mundu rýra traust á Íslandi erlendis

Eftir Friðrik Daníelsson

 

Líklegt er að í aðildarsamning við ESB fengjust tímabundnar undanþágur eða aðlögunartími að ýmsum kvöðum sambandsins. En til frambúðar litið munu lög og reglur ESB gilda hér sem annars staðar í sambandinu. Ísland kæmi ekki lengur fram sem fullvalda ríki, hvorki gagnvart eigin þegnum né í samskiptum við aðrar þjóðir, s.s. í samningum um sameiginlega fiskstofna eða viðskiptsamningum við önnur ríki. Hinn nýi fríverslunarsamningur sem Ísland, Noregur, Liechtenstein og Sviss (EFTA) hafa nú gert við Kanada mundi til dæmis falla úr gildi, en hann markar tímamót í nýþróun viðskiptasamninga okkar við Vesturheim sem hafa setið á hakanum árum saman en eru forsenda þess að Ísland geti verið í fararbroddi í tækni- og atvinnuþróun.

Auðlindir nýttar fyrir ESB

ESB þróast í átt að bandaríkjum þar sem völd yfir auðlindum aðildarríkja eru að færast til miðstjórnarkerfis sambandsins. Fiskimiðin eru þegar undir yfirstjórn ESB og mundu fiskimið Íslands líka færast þar undir með aðild og þau verða nýtt með hag ESB að leiðarljósi. Stærstur hluti teknanna af fiskimiðunum mun þannig með tímanum færast til ESB sem þýðir mikið gjaldeyristap fyrir íslenska þjóðarbúið og mikla hrörnun íslensks sjávarútvegs, sem er gjöfulasta útflutningsgrein Íslands. Svíar eru að missa óskoraðan yfirráðarétt yfir sinni stóru auðlind, skóginum, og ESB hefur þegar forræði á nýtingu sænskra úrannáma. Náttúruauðlindir gömlu heimsveldanna sem ráða ESB eru á þrotum, s.s. málmar, olía og gas. Vaxandi orkukreppa er að þróast í ESB þar sem uppbygging orkuvera hefur verið vanrækt í áratugi og ennþá eru uppi áætlanir um að loka orkuverum. Nú er þó að renna upp fyrir ESB að kjarnorkuvinnsla er eina raunhæfa leiðin til eigin orkuframleiðslu en mestallt nýtilegt úran ESB er í Svíþjóð. Augljóst er að ESB verður annars að auka innflutning jarðefnaeldsneytis og raforku.

Orkulindir á forræði ESB

Ný stjórnarskrá ESB (heitir núna Lissabonsáttmálinn) kveður á um að ESB fái yfirstjórn á orkulindum aðildarlanda sem skulu nýttar í þágu sambandsins. Í grein 100(1) er kveðið á um að ESB muni tryggja afhendingu orku verði skortur á henni í aðildarlöndum. Í grein 176A segir að tryggja skuli virkni orkumarkaðar og öryggi í orkuafhendingu innan ESB. Einnig skulu orkukerfi landanna tengd saman. Þetta þýðir að ESB mun hafa yfirstjórn á hvar og hvernig raforka, olía og gas er afhent. ESB gæti því ákveðið að Ísland verði að afhenda orku til ESB verði Ísland meðlimur. Þetta þýðir til framtíðar litið að hagkvæmir virkjanakostir á Íslandi yrðu nýttir til framleiðslu raforku fyrir ESB. Rafmagnið yrði leitt til ESB gegnum sæstrengi, voru gerðar áætlanir um það fyrir einum og hálfum áratug en voru lagðar á hilluna þá. Árangurinn yrði að frekari atvinnusköpun af orkulindum hér yrði lítil og orkufrekur iðnaður landsins mundi smám saman hrörna. Mögulegar olíu- og gaslindir yrðu sömuleiðis nýttar með hag ESB að leiðarljósi og mikilvægar ákvarðarnir um markaði, stjórnun og skattlagningu færast til ESB.

Aðildarsamningur marklítið skjal

Samningsatriði sem samþykkt eru í aðildarsamningi gætu þurft að víkja fyrir lögum og reglum sem í framtíðinni verða sett af ESB. Með inngöngu í ESB fær sambandið löggjafarvald yfir aðildarlandinu, yfirsterkara valdi landsins, sem þýðir að eftir samningsundirritun geta forsendur hans breyst og þar með efndir. Ágreiningsatriði færu til æðsta dómsvalds sem yrði þá ekki í aðildarlandinu heldur ESB-dómstóllinn sem dæmir að lögum ESB. Bretar sömdu um sérákvæði um sín fiskimið sem voru afnumin með dómi; vinnumarkaðskerfi Svía á nú í vök að verjast, svo dæmi séu tekin. Áhrif Íslands á löggjöf og stjórnvaldsaðgerðir ESB yrðu hverfandi og fengi annar samningsaðilinn, ESB, því í raun sjálfdæmi um efndir samningsins. Aðildarsamningur við ESB yrði ekki samningur tveggja bærra aðila með jafnræði og því marklítill.

Aðildarviðræður mundu rýra traust

Fjárfestar og samstarfsaðilar Íslendinga við nýtingu auðlindanna vita að efnahagur landsins byggist á einkaafnotarétti og fullu forræði þjóðarinnar á þessum auðlindum. Traust þessara aðila á Íslandi þarf að haldast til þess að uppbyggingin geti haldið áfram. Aðildarviðræður við ESB yrðu túlkaðar sem uppgjöf þeirrar stefnu að íslenska ríkið hafi óskoraðan umráðarétt yfir auðlindunum og sem yfirlýsing um að Ísland ætli að gefa frá sér yfirstjórn fiskimiða og orkulinda til erlends yfirvalds. Þetta mundi þýða að erlendir samstarfsaðilar, sem flestir koma frá Vesturheimi en ekki ESB, mundu síður taka þátt í verkefnum og uppbyggingu hérlendis á forsendum Íslendinga. Samningar yrðu erfiðari og ekki að fullu á forræði íslenskra aðila né á grunni íslenskra laga. Ísland nýtur trausts sem rótgróið og friðsælt fyrsta heims réttarríki frá fornu fari, mun rótgrónara en helstu ESB-lönd. Það er ein ástæða þess að erlendir aðilar fjárfesta hér. Skattlagning auðlindanna yrði ekki heldur að fullu á íslensku forræði gengi landið í ESB sem veikja mundi traust á getu íslenska ríkisins til að standa við skuldbindingar sínar.

Höfundur er verkfræðingur.

Birtist í Morgunblaðinu 29. maí 2009

 

Samtök fullveldissinna stofnuð.

Fyrr í þessum mánuði voru Samtök fullveldissinna stofnuð.  Fram að stofnfundi sem fyrirhugað er að halda í Ágúst var útnefnd þriggja manna bráðabrigða stjórn.

• Sigurbjörn Svavarsson, Mosfellsbæ
• Guðmundur Ásgeirsson, Reykjavík
• Axel Þór Kolbeinsson, Hveragerði

Samtökin hafa í hyggju að vinna á pólitískum grunni og stefna að framboði til Alþingis.

Meðal helstu baráttumála er að standa vörð um fullveldi Íslands, breytingar á lagaumhverfi fjármálastofnanna, endurskoðun hagstjórnar, aukin sjálfbærni þjóðarinnar og aukin samskipti við þjóðir heimsins með gerð fríverslunarsamninga og tvíhliða viðskiptasamninga.

Fulltrúar samtakana munu ferðast um landið í sumar til að kynna starf samtakanna og hugmyndir ásamt því að bjóða fólki að taka þátt í starfi okkar og móta sameiginlega grunnstefnu.  Tilkynnt verður um dagsetningar og staðsetningar þessara funda á þessari vefsíðu ásamt því að vefpóstur verður sendur til þeirra sem eru á póstlista okkar.

Þeir sem hafa áhuga á að skrá sig á póstlista eru beðnir um að senda tilkynningu um það á [e-mail]